ಸ್ವಲ್ಪ ಕಣ್ ಬಿಟ್ಟು ಮೇಲೆ ನೋಡಣ್ಣೋ - ಯಾರು ಬೆಳಕನ್ನು ಚೆಲ್ತಾ ಇರೋದು ಅಂತ ?
ನನ್ನ – ಹೂಗಿಡದ ನಡುವಿನ ಸಲ್ಲಾಪ
----------
ಸಂಚಿಕೆ #9
----------
ಸ್ವಲ್ಪ ಕಣ್ ಬಿಟ್ಟು ಮೇಲೆ ನೋಡಣ್ಣೋ
-
ಯಾರು ಬೆಳಕನ್ನು ಚೆಲ್ತಾ ಇರೋದು ಅಂತ ?
-----------
ಮುಂಜಾನೆ ಸಮಯ 6-00 ಇದ್ದಿರಬಹುದು. ಮನೆಯ ಬಾಗಿಲನ್ನು ತೆರೆದು,
ಆಚೆ ಬಂದೆ, ಕಸದಬುಟ್ಟಿಯನ್ನು ಹೊರಗಿಡಲು. ರಾತ್ರಿ, ತನ್ನ ಸರದಿ(shift )ಯ ಕರ್ತವ್ಯ
(duty ) ಮುಗಿಸಿ, ಹಗಲಿಗೆ ವರ್ಗಾಯಿಸ್ತಾ
ಇತ್ತು. ಪ್ರಶಾಂತ ವಾತಾವರಣಕ್ಕೆ ಸುಂದರ ಮೆರಗು ಆವರಿಸಿದ್ದದ್ದು ನಸು ಬೆಳಕಿನಿಂದ. ಸೂರ್ಯೋದಯ ಆಗಿರಲಿಲ್ಲ. ಆದರೂ ಹಿತವಾದ ಬೆಳಗು.
ಇದ್ದಕ್ಕಿದ್ದಂತೆಯೇ ,
ನನ್ನ ತನ್ಮಯತೆಗೆ ಭಗ್ನ, ಯಾರದ್ದೋ ಎತ್ತರದ ಧ್ವನಿಯಿಂದಾಗಿ.
“ಹಲೋ, good morning , ಏನಣ್ಣಾ ನೀನು ಮಾಡ್ತಾ ಇರೋದು ಸರೀನಾ?”
ಯಾರಪ್ಪಾ ಇದು , ಬೆಳಿಗ್ಗೆ ಬೆಳಿಗ್ಗೆ, ನನ್ನ ಮೇಲೆ ತಪ್ಪು
ಹೊರಿಸ್ತಾ ಇರೋದು ಅಂತ ನೋಡಿದ್ರೆ….!!
ನನ್ನನ್ನು ಆಗೊಮ್ಮೆ, ಈಗೊಮ್ಮೆ ಸಂವಾದಕ್ಕೆ ಸೆಳೆದು, ನನ್ನ ತಲೆಕೆಡಿಸ್ತಾ (ಗಂಭೀರ ಭಾಷೆಯಲ್ಲಿ ಹೇಳಬೇಕೂಂದ್ರೆ ನನ್ನನ್ನು ‘ಚಿಂತನೆ’ ಗೆ ಒಳಪಡಿಸ್ತಾ ಇದ್ದ ) , ನನ್ನ ಮಿತ್ರ ಹೂವಿನ ಗಿಡ.
“ಓಹೋ, ನೀನಾ? – ಅದೇನು ತಪ್ಪು ಮಾಡಿದೆ ನಾನು- ಒದರು” ಅಂದೆ
“ ಅಲ್ಲಣ್ಣಾ, ಸುಮ್ ಸುಮ್ನೆ ಯಾರ್ಯಾರಿಗೋ credit ಕೊಟ್ಟು ನಮಸ್ಕರಿಸ್ತಾ ಇದ್ದೀಯಲ್ಲಾ? , ಇದು ಸರೀನಾ?”
ಪ್ರಶ್ನಿಸಿತು ಹೂಗಿಡ
“ ಅದೇನು – ಸ್ವಲ್ಪ
ಬಿಡಿಸಿ ಹೇಳು”
“ ಎಲ್ಲಾ ಬಿಟ್ಟು, ಆ ಸೂರ್ಯನಿಗೆ ನಮಸ್ಕರಿಸ್ತಾ ಇದ್ದೀಯಲ್ಲ? ಸ್ವಲ್ಪ ಕಣ್ ಬಿಟ್ಟು , ಆಕಾಶದ ಕಡೆಗೆ ನೋಡಣ್ಣೋ ”
ಆದೇಶ ಹೂಗಿಡದಿಂದ.
ನೋಡಿದೆ – ಆಕಾಶವನ್ನು
ವಾವ್ ! ಚಂ..ದದ ವೃತ್ತಾಕಾರದ
, ಬೆಳಗುತ್ತಿರುವ ಪೂರ್ಣ
ಚಂದ್ರ!
ನಾನು ಅವಾಕ್ಕಾಗಿ, ಆನಂದದಿಂದ ನೋಡ್ತಾ ಇರುವಾಗಲೇ, ಮತ್ತೊಂದು ಆದೇಶವನ್ನು ಹೊರಡಿಸಿತು ಹೂಗಿಡ
“ ಈಗ ಬೆಳಕು
ಕೊಡ್ತಾ ಇರೋದು ಚಂದ್ರನೋ? ಸೂರ್ಯನೋ? , ನಮಸ್ಕರಿಸು, ಧನ್ಯವಾದ ಹೇಳು ಚಂದ್ರನಿಗೆ “
*****
ಮತ್ತೆ ಪೇಚಿಗೆ ಸಿಲುಕಿಸಿತು
ಈ ತರ್ಲೆ ಗಿಡ.
“ ಅಯ್ಯೋ ದೇವ್ರೇ, ಬೆಳಕು ಬರ್ತಾ ಇರೋದು ಇನ್ನೂ ಉದಯಿಸದ ಸೂರ್ಯನದೋ ? ಅಥವಾ ಮೇಲೆ ರಾರಾಜಿಸುತ್ತಿರುವ ಚಂದ್ರನದೋ ?”
ಗೊಂದಲಕ್ಕೊಳಗಾದೆ ನಾನು.
ಗಿಡದ ಆದೇಶಕ್ಕೆ ಗೌರವ ಕೊಡಬೇಕೆನಿಸಿತು.
ಇನ್ನೊಂದು ಅನುಮಾನ ಬಂತು.
‘ಈಗ ಚಂದ್ರನಿಗಷ್ಟೇ ವಂದಿಸಿದ್ರೆ, ತರ್ಲೆ ಗಿಡ ಇನ್ಯಾರನ್ನಾದ್ರೂ ತೋರಿಸಿದ್ರೆ!? ‘
ಹಾಂ! ಒಂದುಪಾಯ ಹೊಳೀತು ನನ್ನ
ದಡ್ಡ ತಲೇಗೆ
ಗಿಡಕ್ಕೂ ಕೇಳಿಸುವ ಹಾಗೆ , ಎತ್ತರದ ಧ್ವನಿಯಲ್ಲಿ ಉಚ್ಚರಿಸಿದೆ
“ಈಗ ಚೈತನ್ಯ ಹಬ್ಬಿಸುತ್ತಿರುವ
ಎಲ್ಲಾ ಬೆಳಕಿನ ಸಂಪನ್ಮೂಲಗಳಿಗೂ – ಇದೋ ವಂದನೆಗಳು”
************
ಹೂಗಿಡ ನನ್ನೆಡೆಗೆ, ಲೇವಡಿಮಿಶ್ರಿತ ವಿಜಯದ ನಗೆ ಬೀರಿತು “ ಏನೋ ! ಮಹಾ! ನನ್ನನ್ನು ಮೂರ್ಖನನ್ನಾಗಿ” ಮಾಡಿದ ಹಾಗೆ.
ನಾನೂ ಒಂಥರಾ ನಗೆಯನ್ನು
ಬಿಸ್ಸಾಕಿದೆ “ ನಾನೇನೂ ಅಷ್ಟು ದಡ್ಡ ಅಲ್ಲ ..ಅಂತ”
ನಾನು ಸೋತೆ ಅಂತ
ತೋರಿಸ್ಕೋಬಾರ್ದು ಅಂತ
**************
ನಂತರ...
ಹಾಗೇ ಒಂದು ಪುಟ್ಟ ಚಿಂತನೆ
ಮನದೊಳಗೆ
“ ನಮ್ಮ ಬದುಕಿನಲ್ಲಿಯೂ ಹೀಗೇ ಅಲ್ವೇ ಆಗೋದು? ಯಾವುದೋ(ನಾವು ನೋಡಿರದ
) ಮಹಾನುಭಾವವರನ್ನು ಪ್ರಪಂಚಕ್ಕೆಲ್ಲಾ ಬೆಳಕು ನೀಡುವವರು ಎಂದು ಒಪ್ಪಿಕೊಂಡುಬಿಟ್ಟಿರ್ತೇವೆ. ಅದು
ಸ್ವಾಭಾವಿಕವೇ, ಆದರೆ , ಬೆಳಕು ಚೆಲ್ಲುತ್ತಿರುವವರು:
ಕೇವಲ ಸೂರ್ಯ ಚಂದ್ರರೋ?
ನಕ್ಷತ್ರಗಳೂ ಇಲ್ವಾ?
ಸುತ್ತ ಮುತ್ತಲಿರುವ ಹಣತೆಗಳು ? ಬೀದಿ ದೀಪಗಳು, ಒಮ್ಮೊಮ್ಮೆ ಮಿಂಚುಹುಳುಗಳೂ...
ಅಂದರೆ , ನಮಗೆ ಬೆಳಕನ್ನು ನೀಡಿದ, ನೀಡುತ್ತಿರುವ , ನಮ್ಮ ಕಣ್ಣೆದುರಿಗೇ
ಇರುವ ಅನೇಕ ಸಣ್ಣಪುಟ್ಟ ಬೆಳಕಿನ ಸಂಪನ್ಮೂಲ ವ್ಯಕ್ತಿ/
ವಸ್ತು/ ಸಂಗತಿಗಳನ್ನು ನಿರ್ಲಕ್ಷಿರುತ್ತೇವೆ.
******
ಹೂಗಿಡದೊಂದಿಗಿನ
ನನ್ನ ಹುಸಿಮುನಿಸನ್ನು ಬದಿಗೊತ್ತಿ,
ಅದಕ್ಕೆ ವಂದಿಸಿದೆ
“ Thanks
ಗುರೂ, ಪರೋಕ್ಷವಾಗಿ, ನೀ ಈ ಬೆಳಕನ್ನು ಚೆಲ್ಲಿದ್ದಕ್ಕೆ “
ಕಾಮೆಂಟ್ಗಳು
ಕಾಮೆಂಟ್ ಪೋಸ್ಟ್ ಮಾಡಿ