ನನ್ನ 66 ರ ಜನ್ಮದಿನದಂದು ಹೀಗೊಂದು ಕೃತಜ್ಞತೆ-ಬರಹ

ನನ್ನ 66 ರ ಜನ್ಮದಿನದಂದು ಹೀಗೊಂದು ಕೃತಜ್ಞತೆ

66 ನೇ ವಯಸ್ಸಿನ ಹೊಸಿಲಲ್ಲಿದ್ದೇನೆ ನಾನು ಇಂದು.

--------

ವೃತ್ತಿ,

ಪ್ರವೃತ್ತಿ

ಮತ್ತು

ಕುಟುಂಬ

ಮೂರೂ ಆವರಣದಲ್ಲಿ,

ಜೀವನವನ್ನು ‘ನಿತ್ಯೋತ್ಸವ’ ವನ್ನಾಗಿ ಆಚರಿಸಿ,

ಒಂದು ಮಟ್ಟದ ಸಾರ್ಥಕತೆ ಪಡೆದಿದ್ದೇನೆ.

ಧನ್ಯತಾ ಭಾವವವಿದೆ.

ಈ ಸಂಭ್ರಮದ ಕ್ಷಣದಲ್ಲಿ,

ಒಮ್ಮೆ ನಡೆದುಬಂದ ದಾರಿಯ ಅವಲೋಕಿಸಿ,

ಕೃತಜ್ಞತೆ ಅರ್ಪಿಸುವ ಕರ್ತವ್ಯ

ಈ ಬರಹದ ಮೂಲಕ.

----------

ಸ್ವಾರಸ್ಯ ಅಂದರೆ ಈ ಬರಹದ ಪ್ರಕ್ರಿಯೆಯಲ್ಲಿ , ನನಗರಿವಿಲ್ಲದಂತೆಯೇ

ನಾ ನಡೆದು ಬಂದ ದಾರಿಯ

ಸ್ಥೂಲ ಅವಲೋಕನವೇ ಆಗಿಬಿಟ್ಟಿದೆ.

-----------

ಇದು ನನ್ನ ವೈಯುಕ್ತಿಕ ಜೀವನದ ಸ್ವಗತ.

ಆದರೂ ಯಾಕೆ ಪ್ರಕಟಿಸಿದ್ದೇನೆ?

{ ಒಂದು ರೀತಿಯ ಮುಜುಗುರದಲ್ಲೇ ಇದನ್ನು ಬರೆದಿದ್ದೇನೆ – ಕಾರಣ ಅದ್ಯಾವ ದೊಡ್ಡಮನುಷ್ಯ ನಾನು, ಇಂಥದ್ದನ್ನು ಬರೆಯುವುದಕ್ಕೆ?....ಅನ್ನೋ ಭಾವವೂ ಒಂದುಕಡೆ !! }

*************

ಮೂರು ಕಾರಣಗಳು.

1. ನನ್ನ ಧನ್ಯತಾ ಭಾವವನ್ನು ನಾಕು ಜನರೊಂದಿಗೆ ಹಂಚಿಕೊಂಡು ಖುಶಿಪಡುವುದಕ್ಕಾಗಿ.

2. ಜನ್ಮದಿನದಂದು, ನನ್ನಂತಹ, ಇಳಿ ವಯಸ್ಸಿನ ಬಂಧುಮಿತ್ರರಿಗೆ ಈ ಬಗೆಯ ಭಾವನೆಗಳು ಬರುತ್ತವೆಯೇ ಎಂದು ತಿಳಿದುಕೊಳ್ಳುವ ಕುತೂಹಲ.

3. ನನಗಿಂತ ಕಿರಿಯರಿಗೆ ಇದು ಒಂದು ರೀತಿ ‘ಮಾರ್ಗದರ್ಶಿ’ ಆದರೂ ಆಗಬಹುದೇನೋ! ? ( ಆಸಕ್ತರು, ತಮ್ಮ ಪ್ರತಿ ಜನ್ಮದಿನದಂದು, ಹೀಗೊಮ್ಮೆ ನಡೆದು ಬಂದ ದಾರಿಯನ್ನು ಅವಲೋಕಿಸಿಕೊಂಡರೆ ಚೆನ್ನಾಗಿರುತ್ತೇನೋ )

**************

**************

ಇಷ್ಟು ಪೀಠಿಕೆ ನಂತರ , ಈಗ ನನ್ನ ಕೃತಜ್ಞತಾರ್ಪಣೆ ಪ್ರಾರಂಭ

----------------

ಈಗ ಉದ್ಭವಿಸಿದ ಪ್ರಶ್ನೆ ???

----------------

ಯಾರು ಯಾರಿಗೆ, ಯಾವುದಕ್ಕಾಗಿ ಕೃತಜ್ಞತೆ ಸಲ್ಲಿಸಲಿ ?

1. ನನಗೆ ಜನ್ಮ ನೀಡಿದ ನನ್ನಮ್ಮ – ಅನ್ನಪೂರ್ಣೆ, ನನ್ನಪ್ಪ – ನಾರಾಯಣ ( ಶೇಡಿಮನೆ ನಾರಣಣ್ಣ ). ಅತಿ ಮುಖ್ಯವಾಗಿ, ತಮ್ಮ ಇತಿ-ಮಿತಿಯಲ್ಲಿಯೇ , ಚಂದವಾಗಿ ಪಾಲನೆ- ಪೋಷಣೆ ಮಾಡಿದ್ದಕ್ಕಾಗಿ, ಉತ್ತಮ ಸಂಸ್ಕಾರ ಬಿತ್ತಿ, ಒಲವಿನಿಂದ ಬೆಳೆಸಿದ್ದಕ್ಕಾಗಿ.

---

2. ನನ್ನೊಳಗೆ ( ಅಂದರೆ ನನ್ನ DNA ಒಳಗೆ) ನನಗರಿಯದಂತೆಯೇ ಅಂತರ್ಗತವಾಗಿರುವ ಪೂರ್ವಜರ ಗುಣಗಳ ಋಣಕ್ಕೋ?

----

3. ನನ್ನ ಬಾಲ್ಯದಲ್ಲಿ ಒಂದು ಶಿಕ್ಷಣ ಶಾಲೆಯಂತಿದ್ದ, ಹಂಸಗಾರಿನ ಶೇಡಿಮನೆ ದೊಡ್ಡ ಕುಟುಂಬದ ಪರಿಸರಕ್ಕೋ?

----

4. ಬಾಲ್ಯದಲ್ಲಿ, ಮಲೆನಾಡಿನ , ಜೋಗ ಜಲಪಾತದ ಸಮೀಪದ, ಕಣಿವೆಯೊಳಗಿನ ನಮ್ಮಹಳ್ಳಿ ಕಾಳಮಂಜಿಯ ಹಸಿರುಕಾನು, ಕಾಲುದಾರಿ, ಬೆಟ್ಟ, ಗುಡ್ಡ, ಝರಿ, ಹಕ್ಕಿ ಪಕ್ಷಿಗಳ ಚಿಲಿಪಿಲಿ , ವಿಸ್ಮಯದ ಪ್ರಾಕೃತಿಕ ಪರಿಸರಕ್ಕೋ?

-----

5. ಬೆಟ್ಟಕ್ಕೆ ಹೋಗಿ ಭರ್ಜರಿ ಸೊಪ್ಪಿನ ಹೊರೆ ಹೊತ್ತು ಅಡಿಕೆ ತ್ವಾಟಕ್ಕೆ ಹಾಕಿ, ಮಳೆ-ಬಿಸಿಲೆನ್ನದೆಯೇ ಕೃಷಿ ಕೆಲಸಗಳನ್ನು ಸ್ವಲ್ಪವೂ ಬೇಸರಿಸದೆ ಮಾಡುತ್ತಿದ್ದ, ನಮ್ಮನೆಯ ಕೆಲಸದಾಳು , ಶೆಟ್ಟಿ ನಾರಾಯಣ ಕಲಿಸಿದ ಶ್ರದ್ಧೆ , ನಿಯತ್ತಿಗೋ ?

------

6. ಬಾಲ್ಯದಲ್ಲಿ, ರಾಮಾಯಣ , ಮಹಾಭಾರತದ ಕಥೆ ಗಳನ್ನು ನಮ್ಮೊಳಗೆ ನಾಟಿಸಿ, ಯಾವತ್ಕಾಲಕ್ಕೂ ಸಮಾಜದ ಭಾಗವಾಗಿರುವ, ದೇವ, ರಾಕ್ಷಸ, ಮನುಷ್ಯ ಗುಣಗಳನ್ನು ಪರಿಚಯಿಸಿದ, ಭದ್ರಗಿರಿ ಅಚ್ಯುತದಾಸ ರಂತಹ ಕಲಾವಿದರ ಹರಿಕಥೆ ಕಲೆ ಗೋ?

ಕೆರೆಮನೆ ಶಂಭುಹೆಗ್ಡೆ, ಚಿಟ್ಟಾಣಿ ರಾಮಚಂದ್ರ ಹೆಗ್ಡೆಯಂತಹ ಅನೇಕರ ಅದ್ಭುತ ಯಕ್ಷಗಾನ ಕಲೆಗೋ?

-------

7. ನಮ್ಮ ಅವಿಭಕ್ತಕುಟುಂಬದಲ್ಲಿ,

ಪ್ರತಿ ಸಂಜೆಯ ಸಾಂಸ್ಕೃತಿಕ ಪರಿಪಾಠ ( ಬಾಯಿಪಾಠ, ಶ್ಲೋಕಪಠಣ, ಭಜನೆ ,ಹಾಡು ) ನನ್ನೊಳಗೆ ಬಿತ್ತಿದ ಸಂಗೀತಾಸಕ್ತಿಯ ಪರಿಗೋ?

--------

8. ಸಂಗೀತ, ನಾಟಕ, ಮಾತುಗಾರಿಕೆಯ ಹುಚ್ಚನ್ನು ಹತ್ತಿಸಿದ ಆಕಾಶವಾಣಿಗೋ?

-------

9. ಕುಟುಂಬದಲ್ಲಿ ಆಗ್ಗಾಗ್ಯೆ ಜರುಗುತ್ತಿದ್ದ ಮದುವೆ, ಉಪನಯನ ಮುಂತಾದ ಕಾರ್ಯಕ್ರಮಗಳಲ್ಲಿ ಲವಲವಿಕೆಯಿಂದ ಓಡಾಡಿಕೊಂಡು, ಚಂದವಾಗಿ ಎಲ್ಲವನ್ನೂ ನಿರ್ವಹಿಸುತ್ತಿದ್ದ ನನ್ನ ಸೋದರ ಮಾವ ಉದ್ದೇಮನೆ ರಾಮಣ್ಣ, ವೆಂಕಟಗಿರಿ ಚಿಕ್ಕಯ್ಯನಂಥವರ Management (ಇಂದಿನ MBA ಪದವೀಧರರಿಂದಲೂ ಸಾಧ್ಯವಾಗದ) ಕೌಶಲ್ಯಕ್ಕೋ ?

---------

10. ಸ್ವೇಚ್ಚೆಯಾಗದಂತೆ ಎಲ್ಲಾ ಸ್ವಾತಂತ್ರ್ಯವನ್ನೂ ಕೊಟ್ಟು ಜಾಗ್ರತೆಯಿಂದ ಹದಿವಯಸ್ಸಿನವರೆಗೆ ಬೆಳೆಸಿದ ನನ್ನಪ್ಪ ಅಮ್ಮನ ಪೋಷಕರ ಜವಾಬ್ದಾರಿಗೋ ?

----------

11. ಒಂದನೇ ತರಗತಿಯಿಂದ – BE- ( Electronics& Communication ) ಸ್ನಾತಕೋತ್ತರದ ವರೆಗೆ , ಶಾಲಾ ಕೊಠಡಿಯೊಳಗೆ, ವಿದ್ಯೆ ಕಲಿಸಿದ ವಿದ್ಯಾ ಸಂಸ್ಥೆಗಳ - ನೂರಾರು ಶಿಕ್ಷಕರ ಜ್ನಾನ –ಕೌಶಲ್ಯಕ್ಕೋ ?

------------

12. ನನ್ನ ಸಂಗೀತಾಸಕ್ತಿ ಗಮನಿಸಿ, ಸುರತ್ಕಲ್ Engineering college ನ ಗ್ರಂಥಾಲಯದ Engineering ಪುಸ್ತಕಗಳ ನಡುವೆ ಎಲ್ಲೋ ಅವಿತುಕೊಂಡಿದ್ದ ‘ ಸಂಗೀತ ರತ್ನ ಚೂಡಾಮಣಿ’ ಪುಸ್ತಕವನ್ನು, ಕರ್ನಾಟಕ ಸಂಗೀತದ ‘ಕಟಪಯಾದಿ ಸೂತ್ರವನ್ನು ನನಗೆ ಪರಿಚಯಿಸಿದ ಪ್ರೊ, ಕೆ.ಎಂ. ಹೆಬ್ಬಾರ್ ಅವರ ಪ್ರೋತ್ಸಾಹಕ್ಕೋ ?

---------------

13. ದಾವಣಗೆರೆಯಲ್ಲಿ 5 ವರ್ಷದ ಇಂಜಿನಿಯರಿಂಗ್ ವ್ಯಾಸಂಗದ ಅವಧಿಯಲ್ಲಿ , ಉಚಿತ ವಸತಿ ಸೌಲಭ್ಯ ಒದಗಿಸಿದ ಚೆನ್ನಗಿರಿ ರಂಗಪ್ಪ-ವಿರೂಪಾಕ್ಷಪ್ಪ ಅವರ ಔದಾರ್ಯದ ಗುಣಕ್ಕೋ?

--------

14. ನನ್ನ 40 ವರ್ಷದ professional ಜೀವನ ಪಯಣದಲ್ಲಿ ಹಂತ ಹಂತವಾಗಿ ಬೆಳೆಸಿದ ಸುಬ್ಬರಾವ್, ಡಾ.ಪ್ರಭಾಕರ್ ರಂತಹ ಅದೆಷ್ಟೋ ವ್ಯಕ್ತಿಗಳ ಮಾರ್ಗದರ್ಶನಕ್ಕೋ ?

----------

13.ಬೋಧನೆಯ ತುಡಿತ ಇರುವ ನನಗೆ, PESIT Engineering ಕಾಲೇಜಿನಲ್ಲಿ ದೊರೆತ ಪ್ರೋತ್ಸಾಹಕಾರೀ ಪರಿಸರಕ್ಕೋ ?

----------

14. ನನ್ನ ಬೋಧನೆಯನ್ನು ಆನಂದಿಸುತ್ತಾ, ನನ್ನಿಂದ ಪ್ರೇರೇಪಣೆ ಪಡೆಯುತ್ತಾ, ನಾನೂ ಜೊತೆ ಜೊತೆಗೇ ಕಲಿಯುವಂತೆ ಮಾಡಿದ , ಸಾವಿರಾರು ವಿದ್ಯಾರ್ಥಿಗಳ ಮನಸುಗಳಿಗೋ?

---------

15. ನನ್ನೊಳಗಿನ ಸುಗಮ ಸಂಗೀತ ಸಂಯೋಜಕನ ಬೆನ್ನು ತಟ್ಟಿದ ಸುಗಮ ಸಂಗೀತ ಮೇರು ಅಶ್ವತ್ಥ್, ಕವಿ ಎಚ್.ಎಸ್. ವೆಂಕಟೇಶಮೂರ್ತಿರಂತಹ ಅನೇಕರ ಪ್ರೋತ್ಸಾಹಕ್ಕೋ?

----------

16. ನಾ ಕಟ್ಟಿ ಬೆಳೆಸುತ್ತಿರುವ ಸುಗಮ ಸಂಗೀತ ಬಳಗ ‘ನಮ್ಮನೆ ಸಂಗೀತ ಪ್ರಣತಿ’ ಯ ಎಲ್ಲ ಕಲಾವಿದರ ಪ್ರತಿಭೆ ಮತ್ತು ಸಹಕಾರಕ್ಕೋ?

-----------

17. ನಮ್ಮ ಸಂಗೀತವನ್ನು ಆಸ್ವಾದಿಸಿ, ಪ್ರತಿಕ್ರಿಯಿಸಿ, ಹಂಚಿ, ಪ್ರೋತ್ಸಾಹಿಸುತ್ತಿರುವ ಸಂಗೀತ ರಸಿಕರ ಅಭಿರುಚಿ, ಅಭಿಮಾನಕ್ಕೋ ?

----------

18. ಸಂಸಾರ ಬಂಡಿಯನ್ನು ಸುಗಮವಾಗಿ ಸಾಗಿಸಲು ಮೃದುವಾಗಿ ತಿರುಗುತ್ತಿದ್ದ ಗಾಲಿ – ಪತ್ನಿ ವಿಜೂಳ ಪ್ರೀತಿ, ಕಳಕಳಿ, ಸರಳ, ಸಾತ್ವಿಕ ಗುಣಕ್ಕೋ?

-----------

19.ಕೊಟ್ಟ ಸ್ವಾತಂತ್ರ್ಯವನ್ನು ಸ್ವೇಚ್ಚೆಯನ್ನಾಗಿ ಪರಿವರ್ತಿಸದೆ, ಹಂತ ಹಂತವಾಗಿ ಬೆಳೆದು, ಉತ್ತಮ ಇಂಜಿನಿಯರ್ ಆಗಿ, ಪತ್ನಿ ರಶ್ಮಿ ಜೊತೆಗೆ ಒಲವಿನ , ಸುಖೀ ಸಂಸಾರ ಸಾಗಿಸುತ್ತಿರುವ ಮಗ ಶಶಾಂಕ್ ನ ಹೊಣೆಗಾರಿಕೆಯ ಜೀವನ ಕ್ರಮಕ್ಕೋ? ಜತನದಿಂದ ಆಪ್ಪ , ಅಮ್ಮನನ್ನು ಜತನದಿಂದ ನೋಡಿಕೊಳ್ಳುತ್ತಿರುವ ಮಗ, ಸೊಸೆಯ ಪ್ರೀತಿ, ಕಳಕಳಿಗೋ?

---------

20. 19 ತಿಂಗಳ ಹಿಂದೆಯಷ್ಟೇ, ಮೇಲಿನಿಂದ ಇಳಿದು ಬಂದು, ನಮ್ಮನೆ ಪರಿವಾರಕ್ಕೆ ಸೇರ್ಪಡೆಯಾಗಿರುವ,ಮುದ್ದು ದೇವತೆ, ಮೊಮ್ಮಗಳು ಆರೋಹಿಯ ಮುಗ್ಧ, ಲವಲವಿಕೆಯ , ಕೇಕೆ, ನಗೆಪತಾಕೆ, ತೊದಲು ನುಡಿ,ಆಟ , ಓಟ, ನಲಿದಾಟಕ್ಕೋ?

---------

21.ನನಗೆ ಬೇಕಾದ ಸಾಮಾಜಿಕ ಮತ್ತು ಸಾಂಸ್ಕೃತಿಕ ಬದುಕನ್ನು ಕಟ್ಟಿಕೊಳ್ಳಲು ಪೂರಕವಾಗಿರುವ ,ಮಾಂತ್ರಿಕ ಅಂತರ್ಜಾಲ ತಂತ್ರಜ್ನಾನದ ಸೌಕರ್ಯಕ್ಕೋ?

Facebook , YouTube ಮುಂತಾದ ಸಾಮಾಜಿಕ ಜಾಲತಾಣಗಳಿಗೋ? ಅದರಿಂದ ನಾ ಸಂಪಾದಿಸಿದ ಸ್ನೇಹ ಸಂಪತ್ತಿಗೋ ?

----------

22. ಇದೆಲ್ಲದರ ಜೊತೆ, ಸುಗಮ ಸುಂದರ ಜೀವನದಲ್ಲಿ ಆಗೊಮ್ಮೆ , ಈಗೊಮ್ಮೆ ನುಸುಳಿರುವ ಕಹಿ ಅನುಭವಗಳು ಕಲಿಸಿದ ಪಾಠಗಳಿಗೋ ?

----------

??

??

*******

ಓಹ್... ಪಟ್ಟಿ ನಿಲ್ಲುವುದೇ ಇಲ್ಲ!!!!!

ಆಲೋಚಿಸಿದಂತೆಲ್ಲಾ..ಅನಂತವಾಗುವ ಸಾಧ್ಯತೆ.

ಇಷ್ಟು ಸಾಕು ಇಂದಿಗೆ

*********

**********

ಇಷ್ಟೆಲ್ಲಾ ಸರಿ...ಆದರೆ?

---

ಈ ಬರಹದಲ್ಲಿ ಒಂದು ಮಹಾ ಪ್ರಮಾದವಾಗಿದೆಯೇ!!!!???

ಇಡೀ ಜಗತ್ತಿನ ಮಹಾಗುರು ಆ ಭಗವಂತನಿಗೇ ವಂದನೆ ಅರ್ಪಿಸೋಕೆ ಮರೆತಿದ್ದೇನೆಯೇ?

!!??!!!?!

----

ಖಂಡಿತಾ ಇಲ್ಲ

---

ನಾ ಪಟ್ಟಿ ಮಾಡಿರುವ ಎಲ್ಲದರಲ್ಲಿಯೂ ದೇವರನ್ನು ಕಂಡಿದ್ದೇನೆ.

ಯಾಕೆ ಅಂದರೆ

ಆ ಕಾಣದ ದೇವರು,

ಅಥವಾ

ಜಗನ್ನಿಯಾಮಕ

ಅಥವಾ ಒಂದು ಮಹಾ ಚೈತನ್ಯ

ನನಗೆ ಯಾವಾಗಲೂ ವಿಸ್ಮಯ ..

ಅರ್ಥ ಆಗಿಲ್ಲ

ಇನ್ನೂ....

*********

ಆದ್ದರಿಂದ 'ಕಾಣುವ ದೇವರುಗಳಿಗೆ' ನನ್ನ ಕೃತಜ್ಞತೆಯನ್ನು ಸಲ್ಲಿಸುವಷ್ಟು ಮಾತ್ರ , ಕಿರಿಯ, ನಮ್ರ, ಮುಗ್ಧ ನಾನು

********

ಇಷ್ಟು ದೀರ್ಘ ಬರಹದ ಮೂಲಕ 'ಬೋರ್ ' ಗರೆತ ಮಾಡಿದರೂ, ಓದುವ ನಿಮಗೆ , ಧನ್ಯವಾದಗಳು