ಗಿಡದ ಜೊತೆ ನನ್ನ ಸಲ್ಲಾಪ - ಸಂಚಿಕೆ #5 (ವಂದನೆ-ಅಭಿನಂದನೆ ಮನುಜ ನಿನಗೆ )-ಬರಹ

ಗಿಡದೊಂದಿಗೆ ( ಮುಂದುವರೆದ)  ಸಲ್ಲಾಪ 

ಸರಣಿ ಬರಹ- ಸಂಚಿಕೆ #5
--------

ವಂದನೆ-ಅಭಿನಂದನೆ ಮನುಜ ನಿನಗೆ  
***********

ಓದುಗರಲ್ಲಿ ವಿಜ್ಞಾಪನೆಗಳು

*******

ಗಿಡದೊಂದಿಗೆ ಮಾತು ಸರಣಿಯ 5 ನೇ ಸಂಚಿಕೆ ಇದಾಗಿರೋದ್ರಿಂದ , ಹಿಂದಿನ ಸಂಚಿಕೆಗಳನ್ನು ನೀವು ಓದಿದ್ದರೆ , ಇಂದಿನ ಸಂಚಿಕೆ ಜಾಸ್ತಿ ರುಚಿಸಬಹುದೇನೋ!

*********

ಗಿಡದ  ನಿನ್ನೆಯ ತೂಕದ ವಿಶ್ಲೇಷಣೆಯ  ಭಾರದಿಂದ ಎದ್ದಿರಲಿಲ್ಲ ನಾನಿನ್ನೂ 

ಮುಂದುವರೆದಿತ್ತು ನನ್ನೊಳಗೇ  ಆತ್ಮಾವಲೋಕನ

ಇಂದು ಗಿಡದ ಬಳಿ ಸುಳಿಯಲೇಬಾರದೆಂಬ ನಿರ್ಧಾರ

----

ಆದರೆ ಅನಿರೀಕ್ಷಿತ , ಆಶ್ಜರ್ಯದ ಸಂಗತಿಯೊಂದು ಘಟಿಸಿತು

ನನ್ನೊಳಗೆ  ಸಂತಸದ ಹೊನಲನ್ನೇ ಹರಿಸಿ , ಧನ್ಯತೆಯ ಭಾವದೀಪ್ತಿಯ ಬೆಳಗಿದ ಸಂಗತಿ  

____

ನಾನಿರುವಲ್ಲಿಯೇ ಗಿಡ ಓಡೋಡಿ ಬಂದು, ಉದ್ಗರಿಸಿತು ಜೋರಾಗಿ

“ ವಂದನೆ – ಅಭಿನಂದನೆ

ನಿನಗೆ ಅಂದರೆ ಇಡೀ ಮನುಜ  ಕುಲಕೆ  “

----

ಏನೋ ವ್ಯಂಗ್ಯ ಇರಬಹುದೆಂದು ನನ್ನ ಊಹೆ

“ ಈ ಗಿಡವನ್ನು ನಂಬುವಂತಿಲ್ಲ “

----

ಆದರೆ,

ತಬ್ಬಿಕೊಂಡಿತು ನನ್ನಗಿಡ

ಕೃತಜ್ಞತೆ  ಭಾವ ಸ್ಪುರಿಸಿ

******************

“ಏನಿದು?  

ಪ್ರತಿದಿನ ನನ್ನ ಕಾಲೆಳೆಯುತ್ತಿದ್ದ ನಿನ್ನ ಈ ಹೊಸ ಅವತಾರ ? “

ಲೇವಡಿ ಮಾಡಿದೆ

ಭಾವುಕತೆಯಿಂದ ಗಿಡ  ಉದುರಿಸಿತು ಈ ನುಡಿಮುತ್ತುಗಳನು :

*********************

ಹೂವುಗಳಿಗೇನು ಗೊತ್ತು ತಮ್ಮ ಚೆಲುವು

ಅದೆಷ್ಟು ಬಗೆ ಬಗೆಯ  ಬಣ್ಣ, ಆಕಾರ, ವಿನ್ಯಾಸ, ಪರಿಮಳ

ನೀವಲ್ಲವೇ

ಹೂವ ಚೆಲುವ ಗುರುತಿಸಿ, ಆನಂದಿಸಿದವರು  ?

ನೀವಲ್ಲವೇ  ಹೂವಿನ ಅರಳುವಿಕೆಯ ಸಹಜತೆಗೆ , ವಿಸ್ಮಯತೆ ಕೊಟ್ಟು , ದಿಟ್ಟಿಸಿ , ಮೂಕರಾದವರು ?

ನೀವಲ್ಲವೇ , ನಿಮ್ಮ ಮಕ್ಕಳ ಹಾಗೆ ,ನಮ್ಮನ್ನೂ  ಪಾಲನೆ, ಪೋಷಣೆ ಮಾಡಿ, ಪ್ರೀತಿಯ ಧಾರೆಯೆರೆದವನು ?

ನೀವಲ್ಲವೇ ನಮ್ಮ  ಛಾಯಾಚಿತ್ರ ತೆಗೆದು , ಆನಂದಿಸಿ , ಬಳಗಕ್ಕೆಲ್ಲಾ ಹಂಚಿ  ಸಂಭ್ರಮಿಸಿದವನು ?

ನೀವಲ್ಲವೇ ನಿಮ್ಮ  ಭಕ್ತಿಭಾವದ ಅಭಿವ್ಯಕ್ತಿಗಾಗಿ , ನಿಮ್ಮ   ನಂಬಿಕೆಯ ದೇವರನ್ನು ಅಲಂಕರಿಸಲು , ಪೂಜಿಸಲು, ಹೂವನ್ನು   ಶ್ರೇಷ್ಠ  ಪರಿಕರವಾಗಿ ಬಳಸಿದವರು  ?

ನಿಮ್ಮ ವನಿತೆಯರಲ್ಲವೇ ,  ಹೂವಿನ ಚಂದದ ದಂಡೆ ಮಾಡಿ,  ಮುಡಿಗೇರಿಸಿ , ಪಾವಿತ್ರ್ಯತೆ ಜೊತೆಗೆ ಸೌಂದರ್ಯವರ್ಧಕ ಪಟ್ಟ ಕೊಟ್ಟದ್ದು ?  

ನಿಮ್ಮ ಯುವ ಪ್ರೇಮಿಗಳಲ್ಲವೇ ,   ಪ್ರೀತಿಯ ಅಭಿವ್ಯಕ್ತಿಸುವ, ಸಂಕೇತವಾಗಿ ಹೂವಿಗೆ ವಿಶೇಷ ಸ್ಥಾನ ಒದಗಿಸಿದ್ದು  ?

ನೀವಲ್ಲವೇ , ಹಬ್ಬ, ಹರಿದಿನ, ಜಾತ್ರೆ ,  ಉತ್ಸವದ   ಸಂಭ್ರಮವ ಹೆಚ್ಚಿಸಲು,   ಹೂವಿನಲಂಕಾರದ ಮೆರಗನ್ನು ಕೊಟ್ಟದ್ದು ?

ನೀವಿರದಿದ್ದರೆ, ಹೇಗೆ ಗೊತ್ತಾಗ್ತಿತ್ತು ನಮಗೇ ನಮ್ಮ ಮೌಲ್ಯ?

ನೀವಿರದಿದ್ದರೆ , ವಿಶ್ವದ ಕೋಟಿ ಕೋಟಿ ಜೀವಿಗಳಂತೆಯೇ,  ನಮ್ಮದು ಸಾಮಾನ್ಯ ಬದುಕು 

ನಿಮ್ಮ ಅನನ್ಯ ಬುದ್ಧಿ, ಭಾವ , ಸೌಂದರ್ಯ ಪ್ರಜ್ಞೆ  , ನಂಬಿಕೆ , ಆಚಾರ  , ವಿಚಾರಗಳಿಂದ  ,  ನಮ್ಮ ಬದುಕಿಗೆ ವಿಶೇಷ ಅರ್ಥ

ನಿಮ್ಮ ಪ್ರಯೋಜನಕ್ಕೆ ನಾವೂ ಇದ್ದೇವೆ ಎಂಬ ಧನ್ಯತೆ.

ಅಂದ ಮೇಲೆ,

ನಾವು ನಿಮಗೆ ಸಲ್ಲಿಸಲೇಬೇಕು

                           ನಿಮ್ಮಿಂದ ನಾವು ಪಡೆದದ್ದಕ್ಕೆ ‘ವಂದನೆ’

                          ನಿಮ್ಮ ಅನನ್ಯ ಸಾಮರ್ಥ್ಯಕ್ಕೆ ‘ಅಭಿನಂದನೆ’   

*******

ನಾನು ಇನ್ನಷ್ಟು ಮೌನಿಯಾದೆ

ಅಪರಾಧಿ ಮನೋಭಾವಗಳ  ಕಾರ್ಮೋಡ ಕರಗಿ

ಧನ್ಯತೆಯಾವರಿಸಿದ 

ನೀಲ , ಶುಭ್ರ , ಪ್ರಶಾಂತ ಆಗಸವಾಯಿತು ನನ್ನ ಮನ

ಕಣ್ಣಲ್ಲಿ ಒಂದು ಹನಿ

ತಬ್ಬಿಕೊಂಡೇ ಇದ್ದೆ  ಕೆಲವು ಕ್ಷಣ ನನ್ನ ಗಿಡವನ್ನು

ಬೆಳಕ ಹಚ್ಚಿದ ಗುರುವನ್ನು